د داعشیانو برید کې څلور عراقي پوځیان وژل شوي

د الدستور عراقي ورځپاڼې د راپور له مخې، د دغه هېواد په شمالي سیمه کرکوک کې د داعش ډلې په یو برید کې څلور عراقي پوځیان وژل شوي دي. راپور کې راغلي چې دا پېښه نن په کرکوک کې د عراقي پوځیانو پر یوه قرارګاه باندې د برید له امله رامنځته شوې ده چې په پایله کې یې څلور پوځیان وژل شوي او څلور نور ټپيان دي. عراق په ۲۰۱۷ میلادي کال کې په یو لړ مراسمو د داعش ډلې ماتول ولمانځل خو په دې وروستیو کې یو ځل بیا دغې ډلې سر راپورته کړی او پر عراقي پوځیانو یې بریدونه پیل کړي دي. د عراقي پارلمان یو شمېر غړي او ایران پلوه ملېشې امریکا د دغې ډلې په ملاتړ تورنوي او وایي چې د امریکایي چورلکو له لوري له یو ځای څخه بل ځای ته د دغې ډلې د وسله والو د لېږدولو په اړه کره شواهد لري.