رحمت الله فیضان
چیرې چې رهبر نه وي، هلته یو ملت له منځه تلونکی دی؛ دا ښایسته شعار د اسرائیلو د جهنمي سازمان (موساد) شعار دی.
د موساد په نوم د اطلاعاتو او عملیاتو ځانګړی انستیتوت کوم چې د استخباراتي فعالیتونو او همدا رنګه د پټو او جاسوسۍ ضد عملیاتو د ترسره کولو مسولیتونه سرته رسوي؛ په ۱۹۴۶ میلادي کال کې د دسمبر په ۱۳مه تأسیس شو.
دا سفاک(وحشي) استخباراتي سازمان په چټکۍ سره د انګلستان او امریکا په استخباراتي همکاریو د اسرائیلو لپاره یو ګټور استخباراتي سازمان ثابت شو.
دلته یوه نقطه اړینه ده او هغه دا چې؛ ډیری کسان داسې فکر کوي چې موساد د اسرائیلو د استخباراتي سازمان تکاملي بڼه ده، خو په حقیقت کې داسې نه ده، موساد د اسرائیلو د استخباراتو چې (شای) نومیږي، یوه برخه ده.
موساد یا د یهودانو تر ځمکې لاندې سازمان، د پنځه عبراني کلمو لنډیز یا اختصار دی، چې (د اطلاعاتو او ځانګړو عملیاتو) مفهوم افاده کوي.
موساد په حقیقت کې د صهیونیسټي رژیم د پټو پولیسو یوه پرمختللې بڼه ده او د هغو پټو او ویشل شویو سازمانونو د یو ځای والي ټولګه ده، کوم چې له لسیزو وړاندې د یهودانو د ګټو او د دغه نسل د مخالفانو پر ضد له اسرائیلو بهر فعالیت پیل کړی وو.
لکه څرنګه چې مو وویل: د موساد د عملیاتو ساحه له اسرائیلو بهر ده او په نورو هېوادونو کې خپل مخالفین پلټي او په نښه کوي یې چې یو څو مشهورې نمونو یې د مثال په ډول را سپړو:
د موساد اجنټانو په 1961م زیږدیز کال کې، د نازیانو یو مشهور افسر او د یهودانو ستر قاتل (اډولف آیشمن) چې په ارجنټاین کې په پټه اوسېده، پيدا کړ، له هغه ځایه یې اسرائیلو ته وتښتاوو او هلته یې اعدام کړ، دا عملیات په نړۍ کې د دې سازمان د اغیزمنتوب په اړه د پراخو تبلیغاتو لامل شو.
موساد د ډېرو فلسطیني مشرانو او مبارزینو په وژلو کې مهم رول ولوباوه، په خاص ډول د میونخ د المپیک په لوبو کې د اسرائیلي لوبغاړو د وژونکو په له منځه وړلو کې.
همدا راز دغه سازمان په دوبۍ کې د حماس د مشر محمود المبحوح په وژنه او همدارنګه د خلیل الوزیر چې په ابو جهاد مشهور وو په وژنه کې مستقیم لاس درلود.
محمود عبدالرؤف المبحوح د حماس یو له لوړ پوړو قوماندانانو څخه و، چې د عزالدین قسام لوا بنسټ یې کېښوود، د ۲۰۱۰م کال د جنورۍ په ۱۹مه د دوبۍ په روتانا نومي هوټل کې د موساد له لوري ووژل شو.
د صهیونیسټ رژیم ۱۲م نمبر تلویزیوني چینل د یوه مستند فلم په خپرولو سره د غزې د مقاومت د دغه قوماندان د وژلو جزئیات افشا کړل او په دغو عملیاتو کښې یې د موساد مسئولیت په ډاګه کړ؛ په دې فلم کې ویل شوي چې د المبحوح وژنې 22 دقیقې وخت واخیست. المبحوح ته یې د یوې مادې په تزریقولو سره، لومړی د هغه عضلات فلج کړل، وروسته یې تنفسي سیسټم کار پرېښوود، چې دا کړنه د هغه د سمدستي مړینې لامل شوه.
خلیل ابراهیم الوزیر، چې په ابو جهاد مشهور وو، یو فلسطیني سیاستوال او نظامي توریست و. هغه د فتح غورځنګ له بنسټ اېښودونکو څخه و، همدا راز د دغه سازمان د مرکزي کمیټې غړی او د الفتح د پوځي څانګې الاصفه قوماندان و. نوموړی په ۱۹۸۸م زیږدیز کال کې په تونس کې د موساد له لوري ترور شو.
همدا زار د موساد له لوري یو کأناډایي انجینر او ساینسپوه چې جرالډ بول نومېده او د صدام حسین له لوري د بابل په پروژه کې د اتمي بمب جوړولو لپاره ګمارل شوی وو، په بلجیم کې ترور کړ.
د عربو او اسرائیلو ترمنځ د شپږ ورځنۍ جګړې په ترڅ کې دغه سازمان د عربي پوځونو ټول حیاتي معلومات ترلاسه کړل او دا مسأله د دې لامل شوه؛ چې اسرائیل په پورتنۍ جګړه کې د پام وړ برتري ترلاسه کړي.
په وروستیو کلونو کې موساد له یو لړ ناکامیو سره هم مخ شوی، چې یو له مهمو ناکامیو څخه یې د ایران پر اټومي تأسیساتو د برید په برخه کې د دغه سازمان بې کفایتي او د لبنان له حزب الله سره د مقابلې وړتیا نه درلودل دي.
د تل آبیب اسلامي پوهنتون، د اسلامي نړۍ لپاره د خطر زنګ:
دا پوهنتون په تل آبیب کې موقعیت لري، چې یو له هغو ځایونو څخه دی چې موساد پکې د اسلامي علومو د پوهانو تر عنوان لاندې جاسوسان روزي او مختلفو اسلامي هېوادونو ته یې د عملیاتو، جاسوسي، د مسلمانانو ترمنځ د اختلافاتو را منځته کولو، د مسلمانانو په منځ کې د ډلو ټپلو جوړولو او په اسلامي هېوادونو کې د تاووتریخوالي خپرولو په موخه له روزلو وروسته اسلامي هېوادونو ته استوي.
دا پوهنتون په ۱۹۵۶م میلادي کال کې تأسيس شوی او له ۶۷ کالو را په دېخوا په دې پوهنتون کې د اسلامي علومو لکه تفسیر ،حدیث، فقه، اسلامي تاریخ عربي ژبه او په اسلامي علومو پورې تړلي نور علوم تدریسیږي.
دا پوهنتون یو تړلی پوهنتون دی او له یهودیانو پرته بل هیڅ محصل ته د داخلېدو اجازه نه ورکول کېږي، د موساد له لوري د دغه اسلامي پوهنتون جدي څارنه کېږي، د محصلینو او استادانو لپاره د درسي موادو او نصاب ټاکل د موساد له لوري د یو دقیق پلان له مخې ترسره کېږي؛ د اسلامي علومو ترڅنګ محلصینو ته استخباراتي زده کړې هم ور کول کېږي.
کله چې یو محصل له دې پوهنتون څخه فارغ شي اسلامي نوم ورته غور کېږي. شیخ ابوبکر او دېته ورته نومونه، له هغه وروسته د ستر دیني عالم په توګه معرفي کیږي او په اسلامي نړۍ کې د مسلمانانو په منځ کې د یو دیني عالم او شیخ په نامه په ډېر دقت سره د کار فرصت او موقعیت ورته ټاکل کېږي.
کله چې په اسلامي نړۍ کې د مسلمانانو په منځ کې خپل کار پیل کړي او له مسلمانانو سره اړیکه جوړه کړي، په ډېر دقت سره د مسلمانانو په اړه خپل مالومات موساد ته انتقالوي او د موساد له لوري جوړې شوي فتواګانې بیا د مسلمانانو په منځ کې خپروي؛ د موساد په لاس تربیه شوي شیوخ هڅه کوي؛ چې د مسلمانانو په منځ کې ډلې ټپلې را منځ ته کړي او بیا د دې ډلو ټپلو ترمنځ فرقوي اختلافات وکري او په خپلو منځو کې یې په جګړو واچوي.
موساد له لوري د استخباراتي موخو لپاره د پېغلو انجونو استخدام:
موساد له مودو راهسي د روسیې په پخوانیو جمهوریتونو، د شرقي اروپا په هېوادونو او اسلامي هېوادونو کې د ځوانو انجونو د استخدام لپاره داسې اعلانونه خپروي چې د هوټلونو د کارکوونکو، د نڅا کمپنیو، د تجارتي کمپنیو د اعلانونو لپاره موډل انجونې په لوړ معاش په دنده ګوماري، یادې انجونې چې زیاتې ښکلې او تر شلو کلونو يې عمر لږ وي، ټولې د اسرائیل هېواد ته استول کېږي، د عربي د زده کړې، د پټو مخفی فلمونو د ثبت زده کړه، د آواز د ثبت زده کړې لپاره استخدامېږي او وروسته یې د نړۍ نورو هېوادونو ته د جاسوسۍ په موخه لېږي.
تر نورو استخباراتي ادارو د موساد ونډه د انجونو په استخدام کې ډېره ده، چې په دې سره اسرائیل د نړۍ په کچه د قاچاق او فحاشۍ لومړی درجه هېواد دی.
