په شيخ رحيم الله بريد کونکې څوک کيدای شي او څه موخې لري ؟!

که څه هم د دې پېښې پړه تراوسه چا نه ده منلې خو ښکاره خبره ده چې له دواعشو خوارجو پرته بل څوک نشي کيدای ځکه مخکې يې هم په شيخ صاحب باندې مسلح بريد کړی وو او اوس يې هم څو واره اخطارونه ورکړي وو او بله دا چې دا ډول بريدونه چې فقط د انسانانو قتل يې عامه غرض وي له داعشي خوارجو پرته بل څوک نه شي کيدای .
دخوارجو له خوا په مسلمانانو خاصتاً په علماوو بريدونه او هدف ګرځول نوې خبره نه ده او نه د دوی هدف يواځې کوم مشخص افراد دي بلکه دوی د حضرت عمر رضی الله عنه له وخته را پيدا او د اسلام پر ضد يې تخريب او جګړه شروع کړې ، خو د عمر فاروق رضی الله عنه په وخت کې دې فتنې ظهور ونه کړ کله چې عمر رضي الله عنه شهيد کړی شو بيا دوی ته موقع په لاس ورغله ، لکه په اوسني عصر کې هم د عمر ثالث په وخت کې دا فتنه ويده وه خو چې هغه وفات شو نو دوی را بيداره شول.
دوی له مسلمانانو څخه د حضرت عثمان ذوالنورين رضي الله عنه په څېر ستر شخصيتونه شهيدان کړي دي ، دوی د صفّين او جمل په څېر لويې فتنې زېږولې دي ، له دوی څخه دې د خير او ښيګڼې تمه هيڅوک او هيڅکله نه لري .
له دا ډول بريدونو څخه د خوارجو اهداف څه دي ؟ :
د خوارجو هدف مطلق اسلام او مسلمانان دي ، دوی د کوم خاص قانون او خاص مقصد په بناء جګړه نه کوي بلکه مطلق فتنه خپرول ، د انسانانو قتلول او خوند ترې اخستل او ګډوډي رامنځته کول يې مطلب وي ، نه يې کله هم په تاريخ کې واک ترلاسه کړی او نه کوم مقصد ته رسيدلي ، تل د کفارو په ګټه تمام شوي او د هغوی د لاس آله ګرځيدلي خو عجيبه داده چې دوی دوام هم نه شي کولای ، بلکه کله چې را پيدا شي او په چټکتيا سره ډير شي ، قتل او فساد شروع کړي او یو لوی ناورين رامنځته کړي ته به دا ګمان کوې چې دوی واک ته ورسيدل ، ټول خلک يې ګمراه کړل او هرڅه د دوی لاس ته ورغلل او حيران به شې چې اوس به له دوی څنګه خلاصېږو ، د دې فتنې مخه به څنګه نيسو او آخر به څه کيږي خو په ډير لږ وخت کې بيا د دوی زوال شروع شي ، ډير ژر له منځه ولاړ شي او داسې ختميږي لکه مچان .
خوارج نهايت بې ادبه ، قساوة القلوب ، بدګمانه ، او فتنه ګر خلک دي ، په انبياوو هم اعتراض کوي ، په صحابه کرامو هم انتقادونه کوي او نور مسلمانان خو ورته هيڅ هم نه دي .
دا مهمه نه ده چې دوی دې د کوم مذهب يا خاص تنظيم پورې تعلق ولري بلکه د هرځای فتنه ګر د خوارجو له صف سره يوځای کيږي ، داسې هم شوي چې مخکې به د رښتونو مسلمانانو سره په يوه صف کې ولاړ وي ، تلاوت او عبادت ته به يې نور خلک حيران وي خو اصلاً د دوی مقصد د الله رضا او د هغه عبادت نه وي ، عقائد يې خراب وي او په حقيقت کې خوارج وي او له اسلام څخه داسې ژر خارجيږي لکه غشی چې له ليندې څخه وزي .
اوسني خوارج هم د هماغه ذوالخويصره او ذوالثدين له جملې څخه دي ، هغه ذوالخويصره چې رسول الله صلی الله عليه وسلم ته يې ويل چې (اعدل يامحمد فانّک لم تعدل ) عدل وکړه ځکه تا عدل ونه کړ. (معاذالله) ، ځکه د دوی په اړه نبي عليه السلام دا پيشګويي کړې ده چې ذوالثدين او د ده امثال فتنه ګر به په مختلفو زمانو کې را پيدا کيږي او بيرته به ژر ورکيږي خو دا چې اسلام او مسلمانانو ته به څومره زيانونه اړوي ؟ ، د هغه معلومات يواځې الله تعالی ته شته .
تاسې وګورئ د صحابه کرامو په زمانه کې يې څومره زيانونه ورسول ، بيا را وروسته يې اسلام او مسلمانانو ته څومره تاوانونه اړولي ؟! ، داده تر نن تاريخ پورې دوی اسلام او مسلمانانو ته يو ناورين جوړ شوي او تل د اسلامي امت په حساس وخت کې را پيدا شوي ، کله چې مسلمانان د فتحې په درشل دريدلي نو همدا ملعونه طبقه را پيدا شوې او په مسلمان مجاهد يې د شا له خوا څخه وار کړی ځکه د دوی له صفاتو څخه يو صفت داده چې ( يقتلون اهل الاسلام و يدعون اهل الاوثان) د اسلام اهل به وژني خو کفار يا د بتانو اهل به پرېږدي .
نن هم دوی همداسې وکړل چې اهل اسلام بلکه د اهل اسلام تر ټولو رښتونی مصداق (د الله د لارې طالب العلمان ، د رسول الله صلی الله عليه وسلم ميلمانه) يې د الله په کور کې په داسې حال کې په شهادت ورسول چې د قران کريم تفسيرونه او د احاديثو کتابونه يې مخې ته غوړيدلي وو ، د زیاترو طالبانو عمرونه له اتلسو او شلو کلو څخه کم وو او د مختلفو منطقو مسافر وو .
دا به څرنګه ايمان او وجدان وي چې د الله په کور (جومات) کې بيضاوي شريف او مشکوة شريف ته ناست د رسول الله صلی الله عليه وسلم ميلمانه طالبان دې په دومره بې دردۍ په شهادت ورسوي چې نه يې کوم جرم کړی وي او نه تراوسه چا کوم بد ترې ليدلي وي؟!.
په دې کې به حتماً داسې طالبان وو چې د راتګ لپاره به يې د لارې کرايه هم په پور له چا څخه راخستې وي او داسې طالبان به هم وو چې د مور او پلار همدا يو زوی به وو يا به يې د کورنۍ عمده غړی همدا طالب جان وو .
الخوارج کلاب النار ، خوارج د جهنم سپي دي ؛ دغه جمله رسول الله صلی الله عليه وسلم فرمايلې ده او واقعاً چې له دوی سره همدا ښايي چې په جهنم کې دې له جهنميت سره سره يو بل ذلت هم ورباندې مسلط وي .
د خوارجو په اړه زيات مفصل روايات راغلي ، آن تر دې چې د خوارجو په اړه به کومه خبره مبهمه نه وي پاته ، که د دوی په اړه مطالعه وشي نو داسې به ګڼې لکه چې همدا نن رسول الله صلی الله عليه وسلم او صحابه ژوندي وو او دا ننني خوارج يې ليدلي ځکه خو يې د دوی په اړه دومره واضح اقوال فرمايلي دي .
دغه فتنه که څه هم اوس ډېره کمزورې شوې او مسلمانان يې له شر څخه يوڅه خوندي دي خو په کلي توګه لا نده ختمه شوې ، د نن ورځې په څېر ځينې فتنې بيا هم ايجادولای شي ، بايد چې مسلمانان خاصتاً علماء کرام او مجاهدين ورته متوجه شي ، د دوی له منځه وړل او د فتنو مخنيوی يې خپل شرعي او ايماني مسئوليت وبولي .
الله دې د شهيدانو شهادتونه قبول کړي او الله دې زخميانو ته شفاء کامله او عاجله نصيب کړي او له لوی الله جل جلاله څخه غواړو چې دا منحوسه او مبغوضه فتنه ژر تر ژره ورکه کړي .
عبدالرحمن (کافي)