Ahmad Hishom Al-Kurdi
ISHID murakkab va ustalik bilan ijtimoiy tarmoqlar orqali odamlarni o‘z safiga tortadi. Ushbu guruh, ayniqsa, ijtimoiy yoki iqtisodiy muammolarga duch kelayotgan yoki qabul qilinishga muhtoj yoshlarni nishonga oladi.
Ular psixologik, madaniy va hissiy usullardan foydalanib, yoshlar uchun hayot muammolari yechimi sifatida jozibador tasvirni yaratadi. Ko‘pchilik odamlar esa haqiqatdan bexabarligi sababli ular tuzog‘iga tushib qoladi.
Ushbu maqolada ISHID ijtimoiy tarmoqlar orqali odamlarni jalb qilish uchun foydalanadigan usullar ko‘rsatib o‘tilgan:
- His-tuyg‘uga ta’sir qiluvchi kontent tarqatish:
ISHID videolar, suratlar va hikoyalar orqali yoshlarning hissiyotlarini qo‘zg‘atadi va ularga o‘z saflariga qo‘shilish orqali maxsus rolga ega bo‘lishlari haqida xabar beradi. Ular musulmonlarning urush va zulm ichida bo‘lgan holatini aks ettiruvchi kontentni yuqori sifatli va professional dizayn orqali taqdim etadi. Bu, ayniqsa, psixologik jihatdan zaif odamlarga kuchli ta’sir qiladi.
- Yoshlarning hissiy ehtiyojlarini nishonga olish:
ISHID yoshlarning buyuk va “muqaddas” maqsadda qatnashish istagini nishonga oladi. Ular “xalifalik qurish va islomni himoya qilish yoshlarning mas’uliyati” ekanini uqtiradi va faqat ularga qo‘shilish orqali bu maqsad amalga oshishini targ‘ib qiladi.
- Yolg‘on va’da va maqsadlar:
Guruh ba’zan odamlarga yaxshiroq hayot, moliyaviy yordam va hatto oila qurish va’dalarini beradi. Ular xalifalikdagi hayotni adolat va tinchlik hukmron bo‘lgan joy sifatida tasvirlaydi va odamlarni muammo va adolatsizliklardan uzoqlashishga undaydi.
- Keng reklama va shaxsiy aloqalar:
ISHID Twitter, Facebook, Telegram va boshqa ijtimoiy tarmoqlardan foydalanadi. Ular maxsus guruhlar va xabarlar orqali yoshlar bilan muloqot qiladi va ularga psixologik bosim o‘tkazadi.
- Ta’lim va tarbiya kontenti taqdim etish:
ISHID kitoblar, ma’ruzalar va videolar shaklidagi ta’lim materiallarini tarqatadi, bu materiallar diniy ohangda bo‘lib, radikal fikrlarni o‘z ichiga oladi. Ular islomni noto‘g‘ri talqin qilib, ushbu guruhga qo‘shilish diniy majburiyat ekanini targ‘ib qiladi, holbuki bu da’volar ularning maqsadiga xizmat qiladi.
- Turli tillarda targ‘ibot:
ISHID arab, ingliz, fransuz va boshqa tillarda reklama qiladi va shu orqali turli madaniyatlar va mamlakatlar bilan aloqa o‘rnatadi.
- Qur’on va hadisdan noto‘g‘ri foydalanish:
Guruh Qur’on oyatlari va hadislarni o‘z qarashlariga moslab talqin qiladi. Dinga chuqur bilimga ega bo‘lmagan odamlar ulardan oson ta’sirlanib qoladi.
Shunday qilib, ISHID ijtimoiy tarmoqlardan foydalanib, ayniqsa, o‘ziga xoslik, ma’no va ijtimoiy qo‘llab-quvvatlashni izlayotgan odamlarni jalb qiladi.
