Usama Haqqoniy
Garchi ISHID o‘zini musulmonlarga islomiy va jihodiy guruh sifatida tanishtirsa-da, uning faoliyati va xatti-harakatlari butunlay boshqa haqiqatni namoyon etmoqda. Masjidlar Islomning ilk kunlaridan buyon musulmon ummatining diniy, ilmiy va ijtimoiy hayotining asosiy markazi bo‘lib kelgan va bundan keyin ham shunday bo‘lib qoladi. Tarix davomida Islom dushmanlari aynan mana shu ma’naviy qal’alarda bir necha bor mag‘lubiyatga uchragan. Din ulamolari masjid minbarlaridan va juma namozlari xutbalarida xalqni Islomga, jihodga va haqni himoya qilishga chorlab kelganlar.
Afg‘onistonda ham AQShning mag‘lubiyati aynan masjid va madrasalardan boshlangan. Bosqinchilarga qarshi jihodga da’vat va ular bilan kurashishning shar’iy jihatdan qonuniy ekanini bayon etish masjid minoralaridan va juma xutbalaridan yangrab turgan. Aynan shu masjid va madrasalar Afg‘onistonni Britaniya imperiyasining qabristoniga aylantirdi Sovet Ittifoqining belini shu yurt tog‘larida sindirdi va AQShning harbiy salobatini ham yer bilan yakson qildi. Bugun ham Alloh taoloning fazli bilan Afg‘oniston Islomiy tuzum soyasida o‘z hayotini davom ettirmoqda.
Ammo ISHIDdan ana shu diniy va ilmiy markazlarni asrash hamda rivojlantirishga harakat qilishi kutilgan bir paytda, aksincha, u masjidlarni o‘z hujumlarining nishoniga aylantirmoqda, ularni vayron qilish uchun portlovchi moddalar joylashtirmoqda va namozxonlarni qo‘rquv hamda vahima ichida qoldirmoqda. Holbuki Alloh taoloning ibodatiga to‘sqinlik qilish va masjidlarni vayron etishga urinish Islomda eng katta gunohlardan sanaladi.
Alloh taolo marhamat qiladi:
وَمَنْ أَظْلَمُ مِمَّنْ مَنَعَ مَسَاجِدَ اللَّهِ أَنْ يُذْكَرَ فِيهَا اسْمُهُ وَسَعَىٰ فِي خَرَابِهَا ۚ أُولَٰئِكَ مَا كَانَ لَهُمْ أَنْ يَدْخُلُوهَا إِلَّا خَائِفِينَ ۚ لَهُمْ فِي الدُّنْيَا خِزْيٌ وَلَهُمْ فِي الْآخِرَةِ عَذَابٌ عَظِيمٌ
Tarjimasi: Allohning masjidlarida Uning nomi zikr qilinishiga to‘sqinlik qiladigan va ularni vayron qilishga urinadigan kishidan ham zolimroq kim bor? Bunday kishilar masjidlarga faqat qo‘rquv bilan kirishlari lozim. Ular uchun bu dunyoda xorlik oxiratda esa ulkan azob bordir.
(Baqara surasi, 114-oyat)
Bu o‘rinda shunday savol tug‘iladi: Nega ISHID masjidlarni nishonga oladi? Axir yuz minglab musulmonlar aynan shu masjidlar orqali din ahkomlarini o‘rganib, Islom ta’limotlari bilan tanishadilar-ku! Afg‘oniston masjidlarini hech qanday jihatdan munofiqlar tomonidan qurilgan Masjidi Ziror bilan taqqoslab bo‘lmaydi.
Masjidi Zirorni qurish ortida to‘rtta yovuz maqsad yashiringan edi: musulmonlarga qarshi fitna uyushtirish, ummat orasida bo‘linish va nizo keltirib chiqarish, Islom dushmanlarini qo‘llab-quvvatlash hamda mo‘minlarga ozor berish. Ammo Afg‘oniston masjidlari iymon, birlik va hidoyat markazlaridir. Bu masjidlardan Alloh taologa itoat qilish, Rasululloh sollallohu alayhi vasallamga ergashish va islomiy birodarlikka chaqiriqlar yangrab kelgan hamda xalqni doimo yaxshilik, taqvo va hamjihatlikka da’vat etib kelgan.
Shu bois, ISHIDning faoliyatini Islom shariati mezonida baholash lozim. Bu guruh amalga oshirayotgan ishlar Muhammad sollallohu alayhi vasallamning shariat hukmlariga mos keladimi? Shubhasiz, javob yo‘q. ISHIDning xatti-harakati va faoliyati Islom shariati tamoyillari hamda hukmlariga hech qanday mos kelmaydi. Shu sababli bu guruh Islomning to‘g‘ri yo‘lidan va Muhammad sollallohu alayhi vasallamning pokiza hamda asl shariat manhajidan og‘ishgan adashgan oqimdir.
