Xalil
Afg‘oniston tarixi bosqinchilarga qarshi kurash va qarshilik bilan chambarchas bog‘liq bo‘lgan yurt bo‘lib, hech qachon zo‘ravonlik va hukmronlik oldida bosh egmagan. Qadim zamonlardan buyon Britaniya mustamlakachilari o‘zlarining butun harbiy qudrati bilan bu zaminga bostirib kirgan bo‘lsalar-da ketma-ket uchta urushda mag‘lubiyatga uchraganlar.
Afg‘onlar Sovet istilosi davrida o‘zlarining birdamligi va milliy g‘ururi bilan Qizil Armiyani chekinishga majbur etdilar. Oradan qariyb yigirma yil o‘tgach esa AQSh va uning ittifoqchilari behuda urushdan so‘ng bu zaminni tark etishga majbur bo‘ldilar. Tarixning ushbu ketma-ket bosqichlari afg‘on xalqining irodasi yengilmas ekanini isbotladi. Biroq bugun mamlakat xavfsizligi tarixida yangi bir sahifa ochildi; bu davrda Afg‘onistonning razvedka va xavfsizlik kuchlari mudofaa va passiv holatdan chiqib hujumkor hamda tiyib turuvchi mavqega ega bo‘ldilar.
Afg‘oniston xavfsizlik yondashuvining o‘zgarishi ayrim qo‘shnilar xususan Pokiston harbiy rejimi tomonidan mamlakatga qaratilayotgan ortib borayotgan tahdidlarga tabiiy javobdir. Yillar davomida Pokiston terrorchi guruhlar va qurolli kuchlardan Afg‘onistonda o‘z ta’sirini o‘tkazish vositasi sifatida foydalanib kelgan. Ammo endilikda u yangi bir haqiqatga duch kelmoqda: bugungi Afg‘oniston kechagi kabi passiv va zaif mamlakat emas.
Afg‘onistonning razvedka va xavfsizlik kuchlari ko‘p yillik kurash va jihodning qimmatli tajribasiga tayanib, mahalliy imkoniyatlardan foydalanib hamda qat’iy iroda bilan har qanday tajovuz va hujumga kuchli va bir necha barobar javob qaytarishga qodir darajadagi tayyorgarlik va qudratga ega bo‘ldilar.
Bu o‘zgarishning eng muhim ko‘rinishlaridan biri chegaradan tashqaridagi tahdidlarga nisbatan yondashuvning o‘zgarishidir. Ilgari Afg‘oniston ko‘pincha javob qaytaruvchi mavqeda turar har bir hujum yoki tajovuzdan keyin shikoyat qilish va xalqaro hamjamiyatning choralar ko‘rishini kutish bilangina kifoyalanardi. Ammo bugun strategik sabr siyosati o‘rnini tahdidni manbaida zararsizlantirish siyosati egalladi. Islom Amirligi matbuot kotibi Zabihulloh Mujohid ochiq aytganidek, Afg‘oniston endi hech kimning tuprog‘i terrorchi guruhlar va xavfsizlikni buzuvchi unsurlar uchun boshpanaga aylanishiga yo‘l qo‘ymaydi va har qanday tahdid, geografik chegaralardan qat’i nazar qat’iy javobga duch keladi.
Yaqinda afg‘on kuchlarining Durand chizig‘i bo‘ylab olib borgan operatsiyalari natijasida Pokistonning o‘nlab harbiy postlari egallandi va bu mamlakat armiyasiga og‘ir talafotlar yetkazildi. Bu strategik o‘zgarishning yaqqol dalilidir. Turli harbiy va razvedka organlarining to‘liq muvofiqlashuvi asosida amalga oshirilgan mazkur operatsiyalar Afg‘oniston xavfsizlik kuchlarining ma’lumot to‘plash aniq rejalashtirish va mamlakat chegaralaridan tashqarida hujumkor operatsiyalarni amalga oshirish borasida yuqori salohiyatga ega ekanini namoyish etdi.
Bu muvaffaqiyatlar Afg‘onistonning barcha yomon niyatli kuchlariga ichki yollanma unsurlardan tortib tashqi omillargacha ularning xotirjamlik va daxlsizlik davri tugaganini aniq bildiradi. Afg‘oniston xavfsizligiga qarshi har qanday harakat qattiq va oldindan taxmin qilib bo‘lmaydigan javobga duch keladi.
Bu xavfsizlik sohasidagi yuksalish shubhasiz Afg‘oniston harbiy rahbariyatining zamonaviy tahdidlar mohiyatini chuqur anglagani samarasidir. Ular bugungi davrda faqat avtomat va sariq bochkalar kabi oddiy vositalar bilan mudofaa qilish mamlakatning xavfsizlik ehtiyojlariga javob bermasligini yaxshi tushunadilar. Havo va ilg‘or texnologiyalardan foydalanadigan dushmanlarga qarshi turish uchun zamonaviy qurol-aslaha hamda zamon talabiga mos mudofaa salohiyati zarur. Shu bois harbiy jihozlarni ishlab chiqarishda o‘z-o‘zini ta’minlashga erishish va qurolli kuchlarning texnik darajasini oshirish Islom Amirligining jiddiy kun tartibiga aylangan.
Shunga qaramay Afg‘onistonning bu sohadagi eng qudratli quroli hamon milliy iroda va millatlar birligi bo‘lib qolmoqda. Bu zamin tarixi ko‘rsatganidek afg‘onlar qachon umumiy tahdid qarshisida birlashgan bo‘lsalar har qanday qudratni yengib o‘tganlar. Bugun ham razvedka va xavfsizlik kuchlari ana shu xalq qo‘llab-quvvatlashiga tayangan holda milliy xavfsizlikning mustahkam ustunlariga aylandilar hamda mamlakatning hududiy yaxlitligi va sha’nini har qanday tajovuzdan himoya qilmoqdalar. Pokiston harbiy rejimi va boshqa yomon niyatli kuchlar shuni bilishlari kerakki bugungi Afg‘oniston endi ular uchun sinov va xatolar maydoni emas va har qanday noto‘g‘ri hisob-kitob qimmat bahoga tushadi.
