2024-yil oxirida Somaliyadagi avtonom Puntland mintaqasining xavfsizlik kuchlari ISHID guruhiga qarshi keng ko‘lamli harbiy amaliyot boshladilar. Ushbu amaliyot davomida hozirgacha 350 kvadrat kilometrdan ortiq hudud ISHID jangarilaridan tozalandi va yuzlab jangchilar o‘ldirildi yoki yaralandi.
Puntland xavfsizlik rasmiylarining ma’lumotiga ko‘ra, ushbu harbiy amaliyot fevral oyining oxirlarida “Kalabir” va “ISHID” hududlari to‘liq tozalangach, uchinchi bosqichga o‘tdi. Hozirda operatsiyaning asosiy e’tibori “Al-Miskad” tog‘ tizmasi, “Maqar” hududi va “Mirali” darasidagi ISHID ning so‘nggi boshpanalarini aniqlash va yo‘q qilishga qaratilgan.
Garchi hozircha ISHID ga yetkazilgan aniq yo‘qotishlar haqida rasmiy statistika e’lon qilinmagan bo‘lsa-da, ijtimoiy tarmoqlarda tarqalgan ma’lumotlar va ba’zi manbalarning bayonotlariga ko‘ra, mahalliy jangarilar bilan bir qatorda, ISHID targ‘ibotiga uchib Somaliyaga hijrat qilgan xorijliklar orasida ham katta yo‘qotishlar bo‘lgan.
E’tiborga molik jihat shundaki, Somaliya ISHID guruhining dunyodagi eng faol va kuchli bo‘limlaridan biri hisoblanadi. Guruh ta’siridagi ko‘plab viloyatlar moliyaviy jihatdan mahalliy aholi va savdogarlarni majburan pul to‘lashga undash orqali ta’minlanardi.
Mazkur voqealar shunday bir paytda yuz bermoqda-ki, Puntland kuchlari bilan birgalikdagi amaliyotlar doirasida AQSh va Birlashgan Arab Amirliklari tomonidan ham harakatlar olib borilmoqda. Bu harakatlar fonida ISHIDning Somaliadagi bo‘limi ketma-ket mag‘lubiyatlarga uchramoqda. Biroq al-Qoida bilan bog‘liq bo‘lgan “Ash-Shabab” harakati esa, somaliyalik, amerikalik va turkiyalik kuchlarning bosimiga qaramay, o‘z yurishlarini davom ettirib, hatto poytaxt Mogadishuga bir necha kilometr masofagacha yetib kelgan.
