Balochiston viloyatida Ja’far Ekspress poyezdiga qilingan hujumdan so‘ng, Pokiston darhol ijtimoiy tarmoqlarda ushbu voqea ortida Afg‘oniston turgani yoki hujum Afg‘onistonda rejalashtirilgani va asosiy tashkilotchilari ham u yerda joylashgani haqida xabar tarqatdi.
Ijtimoiy tarmoqlarda ushbu asossiz da’volar tarqatilgach, bu Pokiston hukumati uchun rasmiy pozitsiyaga aylandi va Pokiston tashqi ishlar vazirligi vakili ham buni tasdiqladi. Agar o‘tgan voqealarga nazar tashlasak, Pokiston doimo o‘z muvaffaqiyatsizliklarini boshqalarga yuklashga harakat qilganini ko‘ramiz. Pokiston armiyasi ham har doim shunday da’volar bilan o‘z xalqini aldab kelgan.
So‘nggi o‘n yilliklar davomida Pokiston Hindistonni Baloch mustaqillik tarafdorlarini qo‘llab-quvvatlashda va ularga logistika hamda siyosiy yordam ko‘rsatishda ayblab kelgan. Ammo hozirda ayblovlar Afg‘onistonga qaratilgan. Lekin Pokistonning ushbu asossiz da’volari ortida qanday omillar bor?
Bu yolg‘on hikoyaning asosiy sabablaridan biri Pokiston razvedka idoralarining «omma orasida mashhur bo‘lgan hikoya» yaratish harakatidir. Oxirgi ikki yil ichida Pokiston Afg‘onistonni yomonotliq qilish uchun keng targ‘ibot kampaniyasini olib bordi. Pokiston o‘zining barcha muvaffaqiyatsizliklarida Afg‘onistonni aybdor qilib ko‘rsatish orqali ichki tanqidlardan qochishga urinmoqda.
Boshqa bir sabab esa Pokistonning «ayb yuklash o‘yini» orqali Afg‘onistonning aniq va hujjatlashtirilgan pozitsiyasini zaiflashtirishga urinishidir. Mavjud ma’lumotlarga ko‘ra, Pokistonga alohida xabar berilgan edi, ya’ni shahid Haji Xalilurrahmonga qilingan hujum Pokiston hududidan uyushtirilgani va hujumchi Balochistondan Afg‘onistonga kelgani haqida ma’lumot yetkazilgan edi.
Shuningdek, Qunduzdagi Kabul Bankka qilingan hujum ham Pokistondan boshqarilgani va hujumchi u yerdan kelgani tasdiqlangan. Bundan tashqari, o‘tgan yili Afg‘onistonda sodir etilgan barcha hujumlar Pokistondan boshqarilgan. Ushbu hujumlarning barchasi haqida Pokistonga rasmiy ma’lumot berilib, dalillar ham taqdim etilgan. Shunga qaramay, Pokiston Balochistondagi poyezdga qilingan hujumdan so‘ng aksincha, hujum ortida Afg‘oniston turganini da’vo qildi.
Yana bir muhim jihat shuki, ISHID tomonidan Molana Homidul Haqga uyushtirilgan hujumdan so‘ng Pokiston qattiq tanqid ostida qoldi. Shuningdek, Balochistonda ISHIDning ayrim yetakchilari qo‘lga olingandan so‘ng, Pokiston ulardan birini – Sharifullahni AQShga topshirdi, qolgan a’zolari borasida esa Eron va Rossiya bilan kelishuvlar olib bormoqda. Ushbu harakatlar Pokistonga qarshi keng tanqidlar boshlanishiga sabab bo‘ldi va ayrimlar Pokiston ikki tomonlama o‘yin o‘ynayotganini iddao qildilar.
ISHID Xuroson bo‘limining Pokistonda bazalari borligi va bu davlat ushbu guruhni boshqarishda, nazorat qilishda hamda ular bilan yashirin kelishuvlarda ishtirok etayotgani haqida Afg‘oniston bir necha bor xalqaro hamjamiyatni ogohlantirgan va Pokistonning ushbu o‘yinlarini fosh qilgan. Endi Pokiston jamoatchilik diqqatini chalg‘itish uchun Afg‘onistonga qarshi ayblovlar ilgari surmoqda.
Bundan tashqari, Afg‘oniston Islom Amirligi Baloch mustaqillik harakatini qo‘llab-quvvatlayotgani haqida hech qanday dalil yo‘q, chunki Islom Amirligining mafkurasi Baloch guruhlarining qarashlari bilan mutlaqo farqlanadi. Balochlarning kurashi millatchilik g‘oyalari asosida shakllangan, holbuki Islom Amirligi o‘zining yo‘nalishini ochiq-oydin belgilab qo‘ygan.
Shunday ekan, haqiqat shuki, Pokiston ushbu asossiz da’volar orqali o‘z muvaffaqiyatsizliklarini yashirishga, o‘z hududidagi ISHID bazalariga bo‘lgan e’tiborni chalg‘itishga va xalqaro siyosiy maydondagi o‘z mavqeini saqlab qolishga harakat qilmoqda.»
