Barkatulloh Daneshvar
Shafqatsiz qattiqko‘ngillik
ISHIDning butun dunyoda, ayniqsa Islom olamida obro‘sini butkul yo‘qotishiga sabab bo‘lgan asosiy omil – ularning haddan tashqari shafqatsizligi va odamlar, oddiy xalq ustidan qilgan qotillik va qirg‘inlaridir.
Shubhasiz, Islom – rahm-shafqat dini bo‘lib, uning barcha ta’limotlarida mehribonlik va muhabbat muhim o‘rin tutadi. Aynan shu mehribonlik xususiyati tufayli Islom qalblarga muhrlanib, odamlarning aqlini zabt etgan.
Shunday bo‘lsa-da, qachonki bir guruh insonlar Islom nomidan urush va qon to‘kish faoliyatiga kirishsa, lekin ularning barcha amallari diniy ko‘rsatmalar va siyosatlarga zid bo‘lsa, qanday qilib ular xalqning roziligiga erishishi mumkin? Qanday qilib Islom soyasida qolib, tuhmat va malomat yomg‘iridan himoyalanishi mumkin?!
Shu sababli, ISHID bir muddat yuziga niqob taqdi, qora bayrog‘ini ustiga oq islomiy so‘zlar bilan yozib ko‘tarib, o‘zini ko‘z-ko‘z qildi. Ammo har bir narsa o‘z nihoyasiga yetadi va adashgan har qanday guruh oxir-oqibat xalq va ilmiy hamda davlat idoralari tomonidan keskin tanqid va rad etishga uchraydi.
Bugun ularning yuzlaridan shu qora niqob, aldovchi go‘yo oq so‘zlar va dabdabali “Islomiy xalifat” da’volari yulib tashlanganidan so‘ng, ularning yuzlari dog‘ tushgan, so‘zlari esa sahro sarobiga aylangan.
Bir guruhning haqiqiy maqsad va niyatlarini eng qisqa vaqt ichida ochib tashlaydigan narsa – bu xalqning ong va tushunchasining oshishi, dunyodagi har qanday voqeani tahlil qilish va anglash qobiliyatining kuchayishidir. Bugungi kunda odamlar osonlik bilan yolg‘on tashviqotlarga aldanib, ko‘r-ko‘rona ulug‘lash yoki hayqiriqlar bilan qabul qilishmaydi.
Aksincha, ular aniq ma’lumot, aql-idrok va donolik bilan tahlil qilib, qabul yoki rad etishadi.
Bugungi kunda har qanday xabar eng zamonaviy axborot tizimlari orqali eng qisqa vaqt ichida hammaga yetib borishi mumkin. Shu bois turli xil va’dalar, aldovlar orqali odamlarni chalg‘itish va aldash endi mumkin emas.
Shuning uchun ISHID ham aynan shunday guruh va harakatlar qatorida bo‘lib, eng qisqa fursat ichida ularning haqiqiy niyatlari fosh bo‘ldi, yolg‘onning idishi haqiqat tomidan ag‘darildi va sinib tushdi. Endi ular dabdabali shiorlar ortiga yashirina olmaydi.
