ليکوال : نور ریښتيا پال
په افغانستان کې د داعش په تشکيلاتو کې ځينې مهمې څېرې په يو نه يو ډول د سيمې او نړۍ له استخباراتي سازمانونو سره له پخوا نه اړيکې لري .
عبدالرحيم مسلم دوست په افغانانو کې هغه لومړی کس ؤ چې له ابوبکر بغدادي سره يې بيعت اعلان کړ ، نوموړی په دې متهم دی چې د پاکستان د طالبانو د تحريک ځينې قوماندانان يې په تبلیغاتي او افراط نه په ډکو فتوی ګانو د جهاد له حقیقي مسير نه منحرف کړل ، د مالدارو پاکستانيانو اختطاف ته يې هڅول ، او دې ته يې تشويقول چې ځينې جيد علماء کرام په بيلابيلو نومونو ووژني .ويل کيږي دا کار يې د پاکستان د ( ISI ) په اشاره کاوه تر څو پاکستاني طالبان په پاکستاني ټولنه کې بدنام کړي. د ده زامنو به په شمالي وزيرستان کې مقيمو عربانو ته په اسلام آباد کې له يوې کمپنۍ نه هغه سټلايټ موډيمونه راوړل چې د انټرنيټ لپاره به کارول کيدل.
د ده يوه ورور به له خليج نه عرب مجاهدينو ته چندې راوړلې . د دقيقو معلوماتو له مخې د مسلم دوست زامن او وروڼه په هغو تحقيقاتو کې چې په امريکايي ډرون حملو کې د القاعدې د ځينو مشرانو د شهادت په اړه ترسره شوي ؤ دخيل ثابت شوي ؤ ، ځکه په اسلام آباد کې هغه کمپنۍ چې د مسلم دوست زامنو عرب مجاهدينو ته ترې موډيمونه راوړل ، په حقيقت کې د ( CIA ) او ( ISI ) د جاسوسۍ يوه ګډه شبکه وه. او دغو موډيمونو له بې پيلوټه الوتکو سره مستقيمه رابطه درلوده ، چې په شمالي وزيرستان کې د القاعده او ځينو نورو جهادي ډلو د مهمو مشرانو د شهادت سبب وګرځيده .
همدغه راز د مسلم دوست يوه ورور د چندو له پیسو سره ځينې داسې الکترونيکي آلات چې ظاهراً به په جهادي امورو کې د استفادې لپاره ؤ ، خو په حقيقت کې د بې پيلوټه الوتکو لپاره چيفونه پکې ځای پر ځای شوی ؤ د القاعدې مشرانو ته ډالۍ کول . څرنګه چې د القاعدې د مشرانو د مسلم دوست په وروڼو زيات اعتماد ؤ له همدې امله به يې له دغوالکترونيکي آلاتو څخه استفاده کوله او په نهايت کې پر دوی د بې پيلوټه الوتکو د بمبارد او د دوی د شهادت سبب وګرځيدل.
( CIA ) ، ( ISI ) او د سعودي استخباراتو د مسلم دوست کورنۍ ته د همدې ستر خدمت په بدل کې چې د القاعدې ملا يې ورته ماته کړه او مهم مشران يې ورته په شهادت ورسول ، په سعودي عربستان کې سياسي پناه ورکړه . او اوس په سعودي کې د بدرالزمان په شمول د مسلم دوست وروڼه اوسيږي.
د پاکستان د خيبر پښتونخوا د پيښور په ښار کې هم د مسلم دوست کورنۍ په آزاده توګه ژوند کوي ، سره له دې چې پاکستان د مسلم دوست په څير د يو چا چې د پاکستان په ضد ښکاره خبرې کوي ، او د پاکستان د طالبانو له تحريک سره ملګری ؤ بې تفاوته ندی پاتې شوی. اوس هم د ډيرو پاکستاني طالبانو کورنۍ ، آن ماشومان او ښځې د پاکستان د ( ISI ) په قيد کې دي.
څرنګه چې سعودي له داعش سره زيات حساس دی ، بايد د مسلم دوست وروڼه يې په سعودي کې يا نيولي وای او يا يې له سعودي نه را اخراج کړي وای ، خو سعودي تر اوسه داسې ونکړل بلکه سياسي پناه يې ورکړې ده او نازوي يې ، او دا د دې ادعايو بل ثبوت دی چې د مسلم دوست کورنۍ ، د ( CIA ) ، ( ISI ) او سعودي استخباراتو په چوپړ کې ده او مسلم دوست د دوی په خوښه داعش ته ورغلی تر څو د داعش له نوم څخه په استفادې د طالبانو په ضد يوه نوې جبهه پرانيزي او طالبان ضعيف کړي.
د داعش په تشکيلاتو کې يوه بله مهمه څيره عبدالهادي امارتي دی ، چې په سعد امارتي اوس يادیږي.
د يوې باوري سرچينې د معلوماتو له مخې امارتي ته له ډيرې مودې را پديخوا د نعيم کوچي د کورنۍ په توسط د ( CIA ) له لوري پیسې ورکول کيدې او د دې لپاره تمويلېده چې يو وخت د طالبانو په ضد سر راپورته کړي. اوس هم د ګډ حکومت د ملي امنيت اداره د خوښۍ د ولسوال عبدالحميد په واسطه له امارتي سره په تماس کې ده او دوه ځله يې د يو کس په واسطه چې حشمت نوميږي پیسې ور استولې دي.
ويل کيږي چې د لوګر والي حليم فدايي ، د لوګر ولايت د ملي امنيت رئيس عطاءالله او د لوګر ولايت د خوښۍ ولسوال عبدالحميد ته ، حنيف اتمر او نبيل دنده سپارلې چې امارتي حمايه کړي ، پیسې او وسلې ورکړي او د طالبانو په ضد يې قيام ته وهڅوي.
په ننګرهار کې د داعش په تشکيلاتو کې مهم قوماندانان چې د طالبانو په ضد د جګړې قومانده په لاس کې لري ، د پاکستان د استخباراتو ( ISI) مهم اجنټان ، حاجي عمر ، جان محمد ، ملک نياز ، او قوماندان بختيار دي.
حاجي عمر چې په ملک عمر هم ياديږي د حاجي خير محمد زوی او د حاجي زمان د تره زوی دی. او دا تر لمر روښانه ده چې د حاجي زمان او خير محمد ټوله کورنۍ له پاکستاني استخباراتو(ISI) سره پياوړی تړاو لري.
جان محمد هم د حاجي زمان له نيږدې خپلوانو څخه دی . او بختيار هم له ( ISI ) سره پوخ تړاو لري.
حاجي عمر او جان محمد تر اوسه اربکيان دي او له ملي امنيت سره کار کوي ، خو اوس يې د داعش بيرغ هم پورته کړی.
د داعش په تشکيلاتو کې حافظ سعيد خان چې د خراسان لپاره د داعش له لوري والي هم ټاکل شوی هغه شخص دی چې د پاکستان له استخباراتو ( ISI ) سره پوخ تړاو لري او لا له پخوا نه له القاعدې سره سخت ټکر ؤ ، او د القاعده پخوانی نظامي مسؤل چې په وزيرستان کې د شاکرالله په نوم مشهور ؤ او بيا يې په پکتيکا کې په خپله استشهادي عمليات ترسره کړل ، او ابوبصير چې يو فلسطينی ؤ ، ده له اورګزيو څخه اخراج کړي ؤ .
له ده سره ملګری شيخ مقبول چې د شاهدالله شاهد په نامه يې د پاکستاني طالبانو ويندويي هم کوله ، د خليج د يوه هيواد په فوځ کې پاتې شوی ، نوموړی شيخ ندی او نه علم لري.
د يوې باوري سرچينې د معلوماتو له مخې پاکستاني طالبانو په نوموړو باندې د حکيم الله محسود او ولی الرحمن محسود په قتل کې د لاس درلودلو شک هم لري ، ځکه د حکيم الله محسود يوه ميرمن اورګزۍ او د دوی د متعلقينو له کورنۍ څخه وه . او له دې لارې يې ځان د حکيم الله محسود شخصي استوګنځي ته رسولی ؤ .
داسې پوخ باور هم موجود دی چې دوی د ( ISI ) په اشاره د پاکستان د طالبانو تحريک اول ټوټه ټوټه کړ او بيا يې له داعش سره بيعت اعلان کړ. سره لدې چې داعش له پاکستان سره هم د دښمنۍ خبرې کوي خو لا تر اوسه یې پاکستان په مقابل کې هيڅ اقدام ندی کړی. او لا يې زمينه ورته مساعده کړې چې د افغانستان خاورې ته داخل شي او هلته په طالبانو د شا لخوا ګذار وکړي.
سر بيره په پورتنيو معلوماتو د ګډ حکومت ځينو چارواکو له څرګندونو څخه هم معلوميږي چې ګډ حکومت داعش دځان لپاره په ګټه بولي او هيواد ته د داعش په راوستلو کې يې له ( CIA ) او ( ISI) سره يو ځای کار کړی او پلان لري چې پخواني اربکيان هم له داعشيانو سره ګډ کړي او هر ځای د طالبانو په ضد تور بيرغونه پورته کړي. او ځکه يې تر اوسه په مقابل کې کوم عمليات هم ندي ترسره کړي. سره له دې چې اشرف غني د داعش په ضد په اصطلاح جنګ اعلان کړ. او دا په داسې حال کې چې داعش د شينوارو ټوله علاقه د پاکستان له اورګزيو ايجنسۍ نه راغلو وسلوالو ته سپارلې او په مقابل کې يې تر اوسه کوم عکس العمل ندی ښودلی.
داسې معلومات هم شته چې د سولی شوری ځينې غړي لکه : مولوي شفيع الله ، په نورستان او کنړ کې ځينې مخور کسان استخداموي او ملي امنيت ته يې معرفي کوي او له ملي امنيت سره يې په ګډه دې ته هڅوي تر څو تور بيرغونه پورته کړي.
ويل کيږي چې طالبانو په نورستان کې درې تنه هغه کسان چې د مولوي شفيع الله له لوري استخدام ، ملي امنيت ته معرفي شوي ؤ او دنده ورته سپارل شوې وه چې تور بيرغونه پورته کړي ، نويلي او وروسته بيا د سپين ږیرو په ضمانت پريښودل شوي دي.
له بلې خوا د داعش له لوري دا اعلان چې د دوی تر ولکې لاندې سيمو کې د اردو ، پوليسو او امنيت کسان په آزاده توګه ګرځيدلای شي او خلکو ته دا اعلان چې د دوی په جنازو کې بايد برخه واخلي د دې ادعا يو بل ثبوت دی چې داعش له ( CIA) او ( ISI ) او ملي امنيت سره په ګډه يوه پروژه ده .
د پورتنيو معلوماتو له مخې ويلای شو چې په افغانستان کې داعش د ( CIA ) ( ISI ) او ملي امنيت ګډه پروژه ده او دوی ټول په يوه کرښه کې د طالبانو په وړاندې جنګيږي.
