شهید زرخان (خالد) تقبله الله د حبیب الرحمن زوی په ۱۳۷۶ هـ.ش کال د میدان وردګو ولایت مرکز، د عشرت خېلو کلي، په یو درنه او دینداره کورنۍ کې دې فاني نړۍ ته سترګې وغړولې. په ۱۳۸۷ هـ.ش کال له خپل مشر ورور سره د قرانکریم د حفظ لپاره ګاونډي هیواد پاکستان ته ولاړ او هلته یې قرانکریم په ناظره یاد کړ او ۵ سپارې حفظ یې هم وکړ، له یو کال وروسته بېرته خپل هېواد افغانستان ته راستون شو او د خپل کلي په مدرسه کې یې ابتدایه درسونه شروع کړل.

نوموړی به د ۱۳ کالو په عمر و چې، د شهید قاري سید آغا (یعقوب) له خوا د ده د کورنۍ د پوره اعتماد او له جهاد سره د ډېرې مینې له وجې د ډلګۍ د مهماتو او اسلحو د حفاظت مسولیت ور وسپارل شو.

د وخت په تېرېدو سره شهید زرخان (خالد) له شهید قاري سید آغا (یعقوب) څخه وغوښتل چې، په کابل ولایت کې د چریکي کارونو ترتیب ورته برابر کړي او د سختو اقتصادي ستونزو سره هم لاس او ګرېوان و، ځکه چې مشر ورور یې هم په بګرام زندان کې بندي و. شهید قاري صاحب چې د ده امانت داري او ځیرکتیا ته کتل، نو په کابل کې د چرکیانو د یو ګروپ مسولیت یې ور په غاړه کړ او ورته ویې ویل؛ چې په کابل کې یو مصروفیت هم پیدا کړه، ترڅو د خپلې کورنۍ لپاره حلاله نفقه هم پیدا کړې او د خلکو به شک هم نه درباندې راځي. د وخت په تېرېدو سره یې په دښمن بېشماره هدفي عملیات ترسره کړل، د اسلام په دُښمنانو یې شپه او ورځ خوب حرام کړی و، له دریو کلونو چریکي عملیاتو وروسته دُښمن ته مطلوب شو، او د شهید قاري سید آغا په هدایت راوغوښتل شو، په میدان شهر کې له خپلو نظامي ملګرو سره یو ځای شو، له خپلو ملګرو سره یې په ډېرو عملیاتو، تعرضونو او کمینونو کې برخه واخسته، په همدې لړ کې د لیزر او درازکوپ پوره مسلکي هم شو، چې د شپې او ورځې یې په غلامانو خوب حرام کړی و او په کم عمر دومره ځیرک او باشهامته غیرتي انسان و، چې له هېڅ اسلحې څخه یې سرغړونه نه کوله، که خفیفه اسلحه به وه، که سقیله، ده به ترېنه کار اخستلو او د هشتاددو هم پوره مسلکي و.

نوموړي شهید د هشتاددو په مټ د بزدله دُښمن ۵ تانګونه د اور خوراک کړل، چې له هغه جملې څخه یې د غلامې ادارې  ۲  ټانګونه د میدان شهر مرکز د نهر پولاد په ساحه کې وویشتل، ۲ ټانګونه د میدان مرکز د غڼډا خېلو په ساحه کې  وویشتل او ۱ ټانګ یې د میدان وردګو ولایت مقام په څومترۍ کې وویشته.

د شهیدانو په نوم د بېز په محاصره کې د سقیله اسلحې مسولیت ورکړل شوی ؤ، لکه: بي ام ۱ زیکویک، دهشکه، هاوان، هشتاد دو، د ده تر اطاعت لاندې ترې کار اخستل کېده چې، په هغې محاصره کې ګڼ شمېر د غلامې ادارې عسکر او اردو ته مرګ ژوبله واوښته.

نوموړي همدارنګه یې په منفجراتو کې هم ډېر زیات مهارت درلود چې د منفجراتو په واسطه یې د دُښمن زیات شمېر ټانګونه تخریب کړل، د میدان شهر د حفیظ الله کوڅې سره نږدې د  دوو پوستو ترمنځ د بوشکې په واسطه ۱ ټانګ د اور خوراک شو.

د نوموړي مسولیتونه: له فتحې څخه  یو نیم کال مخکې، چې قاري سید آغا په شهادت ورسېد او د ډلګۍ مشري یې د ورور قاري نور اغا (مصعب) په غاړه شوه، زرخان خالد یې د ډلګۍ د ملګرو په سر مسول وټاکه، په خپل مسولیت کې یې مهم رول ولوباوه، چې د مشرانو توجو ور واوښته او د مرکز د سرې قطعې مسولیت یې هم ورته وسپاره، چې په همدې لړ کې یې بېلابېل تعرضي عملیات ترتیب او خپله به یې په اول قطار کې برخه اخیسته، دا یې عادت و چې همېشه به تعرض ته خپله مخکې کېده او ګڼې پوستې یې فتحه کړې، له همدې جملې څخه د (فامیلیو پوسته) چې دی پکې په لاس او سترګه زخمي هم شو، ۷ ورځې وروسته بیا د ولایت سره نژدې په یوه پوسته باندې تعرض برابر شو، هغه زخمونه یې لا جوړ شوي نه وو، چې بیا زخمي شو، دا ځل یې شونډه او ژبه پرې شوه، خو بیا هم الله(عزوجل) وساته. د ملا وردګ پوسته د نرخ ولسوالي د جلریز ولسوالي او ورپسې ولایت هم فتحه شو.

یو له مهمو کارنامو څخه یې دا هم وه، چې د دغه ولایت د والي حمزه صاحب په امر باندې، د شهیدانو د بېز لپاره د ځمکې لاندې د لغم (تونل) وهلو مسولیت ورکړل شوی و، چې په ۱۷ ورځو کې ۹۰ متره تونل د ده په سرپرستي سرته رسیدلی و، چې همدا تونل د بېز د تېښتې لامل هم شو.

داسې اخلاق الله(عزوجل) ورکړي وو چې، د هر چا به په اول ځل ملاقات ورسره وشو، هغه به داسې فکر کاوه چې له ماشوم توب څخه مې ملګری دی او د بیا، بیا لیدلو په هیله به یې و.

د شهید خالد تقبله الله  له فتحې څخه وروسته  کارنامې او مسولیتونه: ‎‎

شهید خالد له فتحې څخه وروسته د هېواد په مختلفو ولایتونو کې کارنامې پرېښودې، د مشرانو په مشوره باندې د میدان وردګو ولایت د بهسودو ولسوالۍ کې په باغي علیپور او د هغه په باغیانو پسې، د تصفیوي عملیاتو لپاره له ۸۰ مجاهدینو سره چې مشرې یې د ده پر غاړه وه ولاړ، چې په نتیجه کې یې سیمه له باغیانو پاکه او په ډېر شمېر سره درنې او سپکې وسلې لاس ته ځنې راوړې،  له دغه عملیاتو څخه وروسته د میدان وردګو ولایت ۳۰۰ کسیزې قطعې سره د قطعې د معاون په توګه پنجشیر ولایت ته د تصفیوي عملیاتو لپاره ولاړ، چې هلته یې هم بې سارې سپکې او درنې اسلحې لاس ته راوړې او سیمه یې له پاتې باغیانو څخه پاکه کړه. له دې وروسته له نوموړې قطعې سره د معاون په توګه د تصفیوي عملیاتو لپاره په خوارجو پسې ننګرهار ولایت ته لاړو او سیمه یې له خوارجو څخه پاکه کړه، کله چې عملیات پای ته ورسېدل د مشرانو په مشوره له قطعې سره د تورخم د دروازې د حفاظت لپاره تورخم ته لاړو او هلته یې ۲ میاشتې خپل مسولیت ډېر په امانت دارۍ سره ترسره کړ، عام خلک ډېر ځینې خوښ وو، د تګ راتګ په وخت له ګاونډي هېواد څخه له ۲ میاشتو وروسته د مشرانو په مشوره د استخباراتو لوی ریاست د بتار عملیاتي قطعه کې د سرې قطعې د مشر په توګه وټاکل شو.

په خپل مسولیت کې یې بیا په کابل کې په مختلفو ساحو کې په خوارجو تندریز عملیات ترسره کول. له دې جملې څخه د کابل د خیرخانې په سیمه کې یې په خوارجو عملیات ترسره کړل، چې په نتیجه کې یې ۵ تنه خوارج د جهنم کندې ته ولېږل، دوهم ځل یې د کابل کارته سخي سیمه کې په خوارجو عملیات ترسره کړل، چې په نتیجه کې یې  ۴ تنه خوارج ووژل شول او یو تن ژوندی ونیول شو. درېم ځل د جمعې په ورځ هغه عملیات و چې شهید خالد د جمعې په شپه د خپلو مصروفیتونو له امله کور ته نه و راغلی او د جمعې په ورځ مازدیګر کور ته راغی، لا په کور کې یې دمه نه وه جوړه کړې، چې د یو ملګري له خوا زنګ ورته راغی، چې خالده بېګا ته عملیات تیار دي، خو ته مه راځه ځکه چې ته اوس تللی یې کور ته او ده ورته ویل چې تاسې ځانونه اماده کړئ زه هم در روانېږم، په کور کې خالي پاکې جامې اغوندي او په بیړه سره روانیږي، مور یې ورته وایي، خالد جانه اوس خو فتحه راغلې ده، ټول مجاهدین هره شپه په کور کې  تېروي ستا خو اوس هم شپه او ورځ  په کور کې نه وي، دی ورته وایي چې، مورې دعا کوه، د تلو په وخت کې مور، خپله بي بي او ورور ورپسې شاته روانیږي، تر دروازې او ورور یې په ټوکه کې ورته وایي خالده پاتې شه، دی شاته را ګوري ورور ته په خندا کې وایي خیر یوسې، مور یې ورته وایي زویه داسې ولې ورته وایې؟ ورور یې وایې مورې د مېلمه په شان راغی یو ساعت یې لاهم پوره تېر نه کړ او بېرته راون شو.

د شپې رسېږي کابل ته په بیړه ځي قطعې ته او ملګري اماده کوي او د عملیاتو لپاره کارته نو ساحې ته ځان رسوي او په خوارجو چې په یو کور کې پټ شوي وو د زمري په شان  حمله کوي، عملیات شروع کوي چې په پایله کې ۲ داعشیان ژوندي ونیول شول او ۶ داعشیان د جهنم کندې ته ټېل وهل شول، بالاخره په همدې عملیاتو کې په ۱۴۰۱/۷/۳۰هـ.ش کال زرخان (خالد) هم د شهادت جام نوش کړ.

نحسبه کذالک والله حسیبه

د تنکي زلمي د واده یو نیم کال کېده چې شهید شو.