Ahmad Umar Esfandoy
Ba’zi g’arbiy davlatlar va ularning ta’sirida bo’lgan xalqaro tashkilotlar takfiyri DAISh guruhi bilan kurash haqida gapirib, uni jahon tinchligi va xavfsizligi uchun jiddiy tahdid deb hisoblasalar-da, amalda ochiq va yashirin tarzda, bilvosita yoki to’g’ridan-to’g’ri bu afg’on jamiyatidan chiqarilgan guruh uchun axborot va targ’ibot maydoni yaratishga harakat qilmoqdalar. Xuddi kecha Birlashgan Millatlar Tashkiloti bosh kotibi Antonio Guterres DAISh guruhining global xavfsizlikka tahdidi haqidagi 19-hisobotida yana bir bor bu xavorijlar guruhining tahdidlari haqida asossiz gaplarni tarqatdi, go’yo bu guruh hozirda «butun mintaqa»ga hujum qilish qobiliyatiga ega bo’lib qolgan emish.
Ajablanarlisi shundaki, ushbu hisobotda Afg’oniston DAIShning Xuroson viloyati bo’limi tomonidan mintaqa va Yevropa davlatlariga qarshi hujumlarni rejalashtirish uchun xavfli baza sifatida tavsiflangan bir paytda, bu guruhning so’nggi hujumlari bilan bog’liq qo’lga olingan shaxslar Tojikiston va Pokiston fuqarolari bo’lgan; va ular uchinchi davlat, ya’ni Pokiston, Turkiya va Tojikiston orqali o’z manziliga yetib borganlar.
Shu bilan birga, AQSh Mudofaa vazirligi ham ikki kun oldin DAIShning Xuroson viloyati bo’limi hali ham tahdid bo’lib qolayotganini aytgan edi.
Aytish joizki, ba’zi g’arbiy davlatlarning va BMT amaldorlari bu guruh uchun targ’ibot olib borayotgan va uni oshirib ko’rsatayotgan bir paytda, bu guruh va uning logistika va qo’llab-quvvatlovchi tarmoqlari Afg’onistonda yo’q qilindi va uning xavfi nolga tushdi. Boshqa tomondan, shuni ham aniqlashtirish kerakki, DAISh xavorijlari Afg’oniston xalqi orasida hech qanday mavqega ega emas; hozirgi paytda Afg’onistonda faqatgina bu guruhning nomi bor, maqsadi va mafkurasi esa yo’q.
Aytilganlardan kelib chiqqan holda, BMT AQSh kabi ba’zi g’arbiy davlatlarning ikkiyoqlama siyosatiga ergashib, ushbu davlatlarning yovuz maqsadlarini amalga oshirish uchun ushbu guruh nomidan vosita sifatida foydalanayotgan bo’lishi mumkin va bu loyihani Afg’onistonning qo’shni davlatlarining ba’zi razvedka xizmatlari bilan hamkorlikda amalga oshirmoqda.
