Ahmad Abed
4: Diniy motivlarni buzib ko‘rsatish;
DAISh doimiy ravishda ko‘proq kuch yig‘ish maqsadida diniy motivlarni buzib ko‘rsatadi va aldovchi shiorlardan foydalanib, johil odamlarni o‘z cheklangan fikr doirasiga jalb qiladi. Diniy motivlarni buzib talqin qilish va shar’iy tushunchalardan noto‘g‘ri foydalanish, takfirchi va terroristik guruhlarga qiziqishning asosiy sabablaridan biri hisoblanadi.
DAISh turli xalqlar, xususan, diniy bilimlardan yetarlicha xabardor bo‘lmagan xalqlar orasida o‘z ta’sirini yoyib, islomni noto‘g‘ri talqin qilishga muvaffaq bo‘lgan.
Bu guruh har doim tarafdorlariga shuni ko‘rsatishga harakat qiladi-ki, sof islomni faqat ularning soxta xalifalik qilichlari yordamida amalga oshirish mumkin. Islomdagi ichki ziddiyatlarni esa, mo‘minlarni mushriklar va murtadlardan ajratish vositasi sifatida talqin qiladi. DAIShning fikricha, jannatga yetishish yo‘li qora bayroq ostida olib boriladigan jihoddan o‘tadi.
DAISh o‘z tarafdorlarini diniy motivlarni buzib talqin qilish orqali shunday darajaga yetkazadiki, ular noto‘g‘ri va buzilgan e’tiqodlariga asoslanib, o‘rganganlarini sof islom deb qabul qilishadi va bunga ergashish orqali abadiy najotga erishish mumkin, deb ishonishadi.
Ular doimo o‘z targ‘ibotlarida jihod va hijratni – ikkita muhim ma’naviy burchni – boshqa shar’iy tushunchalardan ustun qo‘yadi. DAISh hijratni “o‘z nazorati ostidagi hududga ko‘chish” bilan cheklaydi va tarafdorlariga bu vazifani diniy burch sifatida bajarishni buyuradi.
DAIShning fikricha, bu diniy burchlar ularning soxta xalifaligining kelajakdagi muvaffaqiyati uchun juda muhim va hayotiy ahamiyatga ega. “Hijrat” atamasini qo‘llashdan asosiy maqsad shifokorlar, o‘qituvchilar, muhandislar va harbiylar kabi turli qatlamlarni jalb qilishdir.
DAIShning “xalifalik” tushunchasini buzib talqin qilishi ham “islomiy xalifalik”ga qiziqqan ayrim yoshlarning ularga qo‘shilishiga katta ta’sir ko‘rsatmoqda.
Musulmonlarning ko‘pchiligi islomiy xalifalikni o‘rnatishga katta qiziqish bildirgani bois, DAISh bu imkoniyatdan foydalanib, yoshlar va o‘smirlarni “xalifalik” so‘zini o‘z tuzog‘i sifatida qo‘llab, ularni halokat yo‘liga boshlash uchun harakat qiladi.
